Futbolli spanjoll është në zi. Mëngjesin e kësaj të marte ndërroi jetë sulmuesi i Tenerifes, Jesus de Miguel pas një ataku kardiak që pësoi pas një përplasjeje të fortë që pati me portierin kundërshtar, Jesus Oëono në ndeshjen me Andorrën.

Futbollisti madrilen u desh të dërgohet me urgjencë në spital ku qëndroi në repartin e terapisë intensive ku luftoi për jetën por pa ia dalë mbanë.  Vetë klubi i Tenerifes bëri të ditur lajmin e hidhur të ndarjes nga jeta të sulmuesit spanjoll përmes një komunikate në rrjetet sociale.

‘Të shkatërruar nga dhimbja, me një nyjë në fyt dhe pa mundur të besojmë se kjo është e vërtetë, CD Tenerife këtë të martë, 3 nëntor ora 08:00 bën të ditur vdekjen tragjike të Jesus de Miguel Alameda-shkruhej në postimin e klubit spanjoll-Nuk ka fjalë që mund të ngushëllojë, nuk ka asgjë që të mund të lehtësojë këtë ndjenjë të mbushur me trishtim. Të gjithë bashkë i qëndrojmë pranë familjes dhe të dashurve të tij dhe të gjithë komunitetit futbollistik të Tenerifes që janë të trishtuar për këtë fund mizor. Familja e Jesus  de Miguel falenderon të gjithë për mbështetjen e shfaqur dhe njëkohësisht kërkon  respektimin maksimal të privatësisë së saj në këto momente të tmerrshme’.

Momenti fatal u regjistrua në minutat shtesë të pjesës së dytë. De Miguel po ndiqte një top të lartë përtej mesit të fushës kur Owono, si lojtari i fundit në mbrojtje i Andorrës u hodh në sulm për të kapur topin dhe  u përplas shumë fort  me sulmuesin. De Miguel ra në fushë dhe humbi ndjenjat dhe menjëherë futbollistët e të dyja skuadrave kërkuan praninë e mjekëve të cilët i dhanë ndihmën e tyre për disa minuta, për t’u larguar më pas nga fusha, ndërsa arbitri Perez Hernandez vendosi pezullimin e ndeshjes. Sulmuesi i Tenerifes u dërgua me urgjencë në spital dhe një ditë më pas ndërroi jetë