Deri në 500 shkolla të mesme në Francë do të qëndrojnë pjesërisht ose plotësisht të mbyllura të hënën, pas ditësh protestash studentore dhe përplasjesh me forcat e rendit.

Ministri francez i Arsimit, Édouard Geffray, deklaroi se mësimi do të pezullohet në rreth 400 deri në 500 shkolla, pasi kushtet e sigurisë nuk konsiderohen të mjaftueshme për zhvillimin normal të mësimit.

Sipas ministrit, 24 institucione arsimore janë djegur ose janë dëmtuar rëndë që nga nisja e protestave, ndërsa 78 punonjës të arsimit janë plagosur.

Protestat nisën në rajonin e Parisit dhe më pas u përhapën në qytete të tjera, përfshirë Montpellier, Nantes dhe Marseille.

Nxënësit kundërshtojnë mungesën e mësuesve, klasat e mbipopulluara, kushtet e dobëta të godinave shkollore dhe problemet e tjera që, sipas tyre, po ndikojnë në cilësinë e arsimit.

Protestat janë shoqëruar me bllokime të shkollave, përleshje me policinë dhe dëmtime të pronës publike dhe private.

Përshkallëzimi i protestave ka sjellë edhe një numër të madh arrestimesh. Sipas autoriteteve franceze, vetëm të premten u arrestuan 1,747 persona, ndërsa numri total i arrestimeve që nga fillimi i lëvizjes ka kaluar 5 mijë. Rreth 85% e të arrestuarve janë të mitur.

Organizatorët kanë bërë thirrje për një tjetër ditë protestash të martën, duke argumentuar se qeveria nuk ka marrë ende masa konkrete për zgjidhjen e problemeve të ngritura nga nxënësit.

Sindikata të mësuesve kanë njoftuar gjithashtu mbështetjen për mobilizimin, duke lidhur kërkesat e nxënësve me shqetësimet e tyre për mungesën e burimeve në sistemin arsimor.

Kryeministri francez, Sébastien Lecornu, deklaroi të dielën se qeveria po ndërmerr hapa të mëtejshëm për të adresuar problemet e ngritura nga nxënësit dhe stafi arsimor.

Masat e përmendura përfshijnë garantimin e vazhdimit të mësimit, përmirësimin e ambienteve shkollore, organizimin më të mirë të ditës mësimore dhe rritjen e transparencës së platformës së pranimit në universitete.

Qeveria ka deklaruar gjithashtu se po përshpejton shqyrtimin e një projektligji që synon të bëjë përgjegjës financiarisht personat që shkaktojnë dëme gjatë akteve të vandalizmit.

Ndërkohë, autoritetet franceze përballen me sfidën e rikthimit të normalitetit në qindra shkolla, ndërsa lëvizja studentore pritet të vazhdojë edhe gjatë ditëve në vijim.

/rtsh.al/