“Rama, cili është problemi juaj me disidentët”, kësaj pyetje të postuar në rrjet nga Partia Demokratike Europiane një ditë pas protestës jashtë Parlamentit në Tiranë, kryeministri Edi Rama i është përgjigjur duke publikuar videon ku shihet duke u sulmuar verbalisht nga disa protestues deputetja Iris Luarasi teksa tentonte të futej në sallën e Kuvendit.
Rama i drejtohet gjithashtu kritikëve të huaj, duke i pyetur nëse kanë diçka për të thënë për këto episode dhe duke i akuzuar se shqetësimi i tyre për demokracinë përfundon përballë “fakteve të pakëndshme”.
Në fund, kryeministri kërkon që Shqipëria të mos përfshihet në debate që, sipas tij, burojnë nga politika “mendjengushtë”, duke argumentuar se vendi është “vërtet i lirë dhe shumë më demokratik” se sa paraqitet nga kritikët e tij.
“Pra, për llojin tuaj të veçantë të demokratëve dembelë, pengimi i deputetëve që të hyjnë në seancën hapëse të Parlamentit quhet “kundërshtim”?
Ndoshta kështu duket nga rehatia e tastierës suaj. Por, jo për kolegët tuaj shqiptarë, nga e djathta në të majtë, të cilët u detyruan të kalonin mes një korridori sharjesh dhe dhune fizike, me vezë e madje edhe gurë të hedhur ndaj tyre, vetëm që të arrinin në vendin e tyre të punës.
A nuk ju vjen turp të mbështesni një sjellje kaq të neveritshme dhe ta shisni atë si kundërshtim demokratik? Me sa duket, jo.
Meqë ra fjala, shikoni se si një deputete e nderuar, një akademike e respektuar dhe një mbrojtëse gjerësisht e njohur e të drejtave të grave, fyhet dhe keqtrajtohet nga modelet tuaja të “kundërshtimit”, teksa thjesht përpiqet të arrijë në vendin e saj të punës.
Dhe kjo nuk ishte as më e keqja nga ato që kolegëve tuaj shqiptarë iu desh të përballonin dje.
Keni ndonjë gjë për të thënë për këtë formë të veçantë të “kundërshtimit”, nga piedestali juaj i lartë demokratik? Apo shqetësimi juaj për demokracinë përfundon aty ku fillojnë faktet e pakëndshme?
Dhe ju lutem, lëreni Shqipërinë të qetë dhe mos e përfshini në këtë histori. Shqipëria është një vend realisht i lirë dhe shumë më demokratik sesa politika juaj mendjengushtë. Ajo nuk meriton të bëhet çamçakëz në gojët mediokre të njerëzve që i shkëmbejnë faktet me angazhim të lirë politik”, shkruan Rama.
