Në ditët e fundit, dy barka që transportonin më shumë se 500 njerëz dyshohet se janë përmbysur pranë bregdetit të Birmanisë, sipas informacioneve nga agjencitë e OKB-së të enjten. Refugjatët nga ky vend, që është në konflikt, ndërmarrin udhëtime të rrezikshme detare duke kërkuar një jetë më të sigurt dhe më të mirë.

Barkat u larguan nga shteti Rakhine i Birmanisë në fund të qershorit, duke mbartur kryesisht individë të pakicës etnike Rohingya. Raportet sugjerojnë se disa nga pasagjerët ishin nga kampet e refugjatëve në Bangladesh, sipas një deklarate të përbashkët të organizatave IOM dhe UNHCR, bazuar në informacionet fillestare.

Ekziston shqetësimi se mund të ketë më shumë se 500 të humbur, njoftojnë raportet.

“Megjithëse incidentet dhe numri i viktimave nuk janë ende të konfirmuara zyrtarisht, UNHCR dhe IOM janë tejet të shqetësuara për mundësinë e humbjeve të mëdha njerëzore.”

Në kërkim të largimit nga dhuna dhe kushtet e vështira në kampet e mbipopulluara në Bangladesh, Rohingya-t e Birmanisë, të cilët kanë hasur persekutim për një kohë të gjatë, kanë marrë rrugën e rrezikshme detare për të arritur në vende si Malajzia, Indonezia dhe Tajlanda.

Në vitin e kaluar, afër 900 Rohingya kanë humbur jetën ose janë zhdukur në Detin Andaman dhe Gjirin e Bengalit, çka e bëri atë kalimin detar më vdekjeprurës në botë për refugjatët dhe emigrantët, sipas OKB-së.

Lidhur me këto ngjarje të fundit, agjencitë e OKB-së raportojnë se barka e parë, me rreth 250 persona në bord, humbi kontaktet menjëherë pas nisjes, kurse anija e dytë, që mbante rreth 280 pasagjerë, dyshohet se u fundos pranë bregut Irraëaddy të Birmanisë më 8 korrik.

“Këto udhëtime ndodhën jashtë sezonit tradicional të lundrimit, kur kushtet detare janë zakonisht më sfiduese,” përmendet në një deklaratë.

Kjo lëvizje masive e Rohingyave nga Rakhine filloi në vitin 2017 pas një sulmi ushtarak të Birmanisë në atë zonë, duke detyruar të paktën 730,000 persona të gjejnë strehim në Bangladesh. Ndërsa Birmania mohon abuzimet ndaj Rohingyave, ajo vazhdon të mos i njohë si shtetas, duke i quajtur klandestinë.

Gjendja u përkeqësua më tej nga puçi ushtarak më 2021 në Birmani, që rezultoi në një konflikt civil të përhapur, ku popullsia Rohingya u përfshi mes luftimeve mes trupave qeveritare dhe Ushtrisë Arakan.

OKB-ja raporton se, gjatë këtij viti, rreth 300 persona janë raportuar të humbur ose të vdekur në Detin Andaman dhe Gjirin e Bengalit, përfshirë refugjatë Rohingya dhe shtetas të Bangladeshit.