Kërçova vazhdon të krenohet me talentet e saj të reja në futboll. KF Vëllazërimi ka shënuar një tjetër sukses të rëndësishëm në turneun ndërkombëtar “Ohri Cup”, ku mori pjesë me pesë gjenerata dhe u dallua me rezultate të shkëlqyera, paraqitje dinjitoze dhe çmime individuale prestigjioze.
Në mesin e mbi 80 ekipeve pjesëmarrëse nga vende të ndryshme, të rinjtë e Vëllazërimit dëshmuan potencialin dhe cilësinë e futbollit kërçovar. Gjeneratat 2013 dhe 2014 zhvilluan ndeshjet e tyre në kompleksin sportiv “Biljanini Izvori”, një nga qendrat më të njohura sportive në rajon, ku zakonisht garojnë skuadra dhe përfaqësuese të nivelit të lartë.
Rezultatet e arritura nga ekipet e klubit ishin mbresëlënëse. Gjenerata 2014 u rendit e dyta në Grupin e Artë, ndërsa gjenerata 2016 u shpall kampione e Grupit të Argjendtë. Gjenerata 2015 përfundoi garat në vendin e pestë, kurse gjenerata 2019, megjithëse me mungesa në përbërje, arriti të renditet e treta në Grupin e Artë.
Paraqitjen më të spikatur e pati gjenerata 2018, e cila siguroi një vend në finalen e madhe të Grupit të Artë. Futbollistët e rinj zhvilluan një turne të jashtëzakonshëm dhe vetëm në minutat e fundit të finales u mposhtën me rezultat 2:1, duke u ndalur shumë pranë trofeut.
Suksesi i klubit u kurorëzua edhe me dy çmime individuale. Portieri i gjeneratës 2014, Veron Xhambazi, edhe pse i lindur në vitin 2015 dhe duke luajtur me një kategori më të madhe, u shpall portieri më i mirë i turneut. Të njëjtin vlerësim e fitoi edhe portieri i gjeneratës 2018, Edlir Eshtrefi, falë pritjeve të shkëlqyera dhe kontributit të tij vendimtar gjatë gjithë garës.
Merita për këto rezultate i takon edhe stafit teknik të përbërë nga trajnerët Nazmi Ajdini, Vlorian Ismaili dhe Agron Zeqiri, të cilët me punën dhe përkushtimin e tyre po ndërtojnë gjenerata premtuese për të ardhmen e futbollit kërçovar.
Paraqitja e KF Vëllazërimit në “Ohri Cup” është dëshmi se puna e vazhdueshme me grupmoshat e reja po jep frytet e saj. Këta futbollistë të rinj janë krenaria e sotme e Kërçovës dhe garanci se e ardhmja e futbollit në qytet mbetet e ndritur.
