Me 59 vota ‘për’ dhe 9 ‘kundër’, deputetët e Kuvendit të Maqedonisë së Veriut e kaluan në lexim të parë Propozim-ligjin për lojërat e fatit, me të cilat parashikohet që kazinotë të largohen së paku 500 metra larg shkollave, por kjo nuk vlen për bastoret. Për pushtetin kjo është një arritje e madhe, ndërsa për opozitën ligji duhet të jetë më rigoroz. Antibixhozi kërkon mbyllje të plotë të lojërave të fatit, shkruan Portalb.mk.

Në seancën plenare të mbajtur më 11 qershor 2026, deputetët e Kuvendit të RMV-së i dhanë dritë jeshile propozim-ligjit për lojërat e fatit, konkretisht ligji kaloi leximin e parë.

“Arritje” e madhe për pushtetin

Menjëherë pas kësaj, deputetët nga pozita u filluan të lavdërohen për këtë arritje.

“Në seancën 104 të Kuvendit u miratua Ligji për lojërat e fatit me 59 vota pro dhe 9 kundër. Sipas ndryshimeve, kazinot nuk do të lejohen pranë shkollave (minimum 500 metra) dhe ndalohet reklamimi i tyre, sidomos ai që e paraqet bixhozin si rrugë drejt suksesit. Gjithashtu, vendoset kontroll më i rreptë përmes GPS në aparate, kufizohen licencat dhe rriten tarifat financiare dhe garancitë bankare. Ligji përfshin edhe standardet e MONEYVAL për luftën kundër pastrimit të parave dhe financimit të terrorizmit”, shkroi deputetja e VLEN, Valbona Adili Emini.

Me reagim të ngjashëm doli edhe deputeti i VMRO-DPMNE-së, Antonio Milloshoski.

“Kuvendi i dha dritën jeshile, duke e mbështetur propozim-ligjin për lojërat e fatit, me të cilin kazinotë nuk do të lejohen të jenë në një distancë prej 500 metrash nga shkollat, ndalohet reklamimi në vitrinat e lokaleve të lojërave të fatit, ndalohet reklamimi që e paraqet kumarin si mënyrë për arritjen e suksesit personal, çdo aparat duhet të ketë detyrimisht sistem lokacioni (GPS) për kontroll të vazhdueshëm nga Drejtoria e të Ardhurave Publike (DAP), licencat nuk do të mund të shumëfishohen, vendosen detyrime financiare për hapjen e pikave të reja të pagesës dhe pagesës së fitimeve, rriten shumat e garancive bankare dhe zbatohet rekomandimi i MONEYVAL-it (Këshilli i Evropës) si standard në luftën për parandalimin e pastrimit të parave dhe financimit të terrorizmit”, shkroi Milloshoski.

Për opozitën ligji duhet të jetë më rigoroz

Në një deklaratë për Portalb.mk, deputeti i LSDM-së opozitare, Fatmir Bytyqi tha se pasi ligji kaloi në lexim të parë, tani është koha për amandamente.

“Mendoj se ligji duhet të jetë akoma më rigoroz dhe më i drejtë në disa aspekte: lokacioni i kazinove duhet të jetë jashtë zonave urbane, ndarja e parave na lojërat e fatit duhet të jetë shumë më transparente dhe jo në mënyrën që është paraparë tani në ligj, reklamimi duhet të jetë plotësisht i ndaluar dhe jo pjesërisht e posaçërisht reklamimi në sport te kategoritë e moshave të reja, gjë që e bën problematike gjithë situatën”, tha Bytyqi.

Kërkuam qëndrim edhe nga deputetja e BDI-së, Rina Ajdari, por deri në publikimin e këtij teksti, deputetja nuk u përgjigj në kërkesën për deklaratë.

Antibixhozi: Gjendje alarmante, të mbyllen totalisht lojërat e fatit

Nga Lëvizja Antibixhoz për Portalb.mk thanë se e përshëndesin miratimin e këtij propozim-ligji, megjithatë mbeten në qëndrimin se lojërat e fatit duhet të mbyllen dhe mos të egzistojnë fare.

“Ligji nuk i plotëson kërkesat e Lëvizjes Antibixhoz ose më mirë thënë nuk plotëson nevojën për mbrojtje totale nga plaçkitja permanente që i bëhet qytetarit dhe mbrojtje nga tragjeditë familjare. Ngel që të presim implementimin e këtij propozimi, informacion për llojin e distancës bëhet fjalë për vijë ajrore apo tokësore. Ne nga Lëvizja AntiBixhoz jemi për mbylljen totale të atyre objekteve”, tha Xhemal Abdiu nga Antibixhozi.

Çfarë thotë propozim-ligji?

Në Nenin 24 të ligjit thuhet:

• Hapsirat afariste ku organizohen lojëra fati në kazino, klube automatësh dhe lojëra elektronike të fatit duhet të jenë të vendosura së paku 500 metra larg shkollave fillore dhe të mesme.
• Kushti për distancën nga paragrafi (2) i këtij neni nuk vlen për hapjen e pikave të pagesës dhe pagesës së fitimeve për organizimin e lojërave të fatit në bastore.
• Në pikat e pagesës dhe pagesës së fitimeve të organizatorëve të lojërave të fatit në bastore, të cilat ndodhen në një distancë deri në 500 metra nga shkollat fillore dhe të mesme, nuk lejohet vendosja e terminaleve elektronike të videolotarisë, terminaleve apo kompjuterëve për lojëra elektronike të fatit.

Propozim-ligjin e plotë mund ta lexoni KËTU.

Kur pritet të hyjë në fuqi?

Neni 193 thotë se: Ky ligj hyn në fuqi ditën e tetë nga dita e publikimit të tij në Gazetën Zyrtare të Republikës së Maqedonisë së Veriut.

Ndërkaq Neni 180 përcakton se organizatorët e lojërave të fatit janë të detyruar ta harmonizojnë veprimtarinë e tyre me dispozitat e ligjit brenda gjashtë muajve nga dita e hyrjes në fuqi të këtij ligji. Nëse nuk e bëjnë këtë, Qeveria e Republikës së Maqedonisë së Veriut, me propozim të Ministrisë së Financave, do t’ua heqë licencat me vendim.

Kujtojmë se ky propozim-ligj u zvarrit vazhdimisht, fillimisht pasi më 7 gusht 2025 u dorëzua në Kuvend pas miratimit nga Qeveria 16 korrik 2025, gati se një vit më vonë, në prill 2026 u tërhoq për precizim, ndërsa më pas u miratua përsëri më 12 maj nga Qeveria.Për këtë ligj, opozita vazhdimisht ka akuzuar se qeveria i mashtron qytetarët dhe se në praktikë kjo nuk do të zbatohet ashtu siç ata e promovojnë dhe se gënjejnë popullin.

Koalicioni VLEN i cili është në pushtet, ndryshe premtoi dhe ndryshe veproi. Ky koalicion para se të bashkohet në një parti, e ndërtoi identitetin e tij elektoral rreth premtimit radikal, mbylljen e të gjitha kazinove dhe largimin e bixhozit nga jeta e përditshme e qytetarëve.Përpjekje për të rregulluar industrinë e lojërave të fatit ka pasur disa herë në të kaluarën, përfshirë edhe gjatë qeverisjes së mëparshme LSDM–BDI. 

Në mars të vitit 2024, Parlamenti nuk arriti të miratojë Ligjin për Lojërat e Fatit dhe Lojërat Argëtuese, i cili do të parashihte që objektet e lojërave të fatit të zhvendoseshin më shumë se 500 metra nga shkollat fillore dhe të mesme. 

Kjo ishte përpjekja e dytë për të miratuar një zgjidhje ligjore pasi ligji u miratua nga deputetët më 7 shkurt, por Presidenti i atëhershëm i vendit, Stevo Pendarovski, nuk e nënshkroi Dekretin.