Të paktën 90 persona kanë humbur jetën si pasojë e një shpërthimi të fuqishëm në një minierë qymyri në provincën Shanxi, në veri të Kinës.

Sipas agjencisë shtetërore të lajmeve Xinhua, shpërthimi i gazit ndodhi të premten rreth orës 19:29 me orën lokale në minierën e qymyrit. Në momentin e aksidentit, në minierë ndodheshin 247 punëtorë.

Operacionet e kërkim-shpëtimit po vazhdojnë intensivisht, ndërsa autoritetet kineze kanë mobilizuar 345 efektivë nga gjashtë ekipe të specializuara për të ndihmuar në vendngjarje.

Presidenti kinez Xi Jinping kërkoi që të mos kursehen përpjekje për trajtimin e të plagosurve dhe gjetjen e të mbijetuarve. Ai gjithashtu urdhëroi një hetim të plotë për zbardhjen e shkaqeve të aksidentit dhe vënien para përgjegjësisë të personave përgjegjës.

Sipas mediave shtetërore, zyrtarët që drejtonin minierën janë ndaluar nga autoritetet, ndërsa shkaku i shpërthimit ende nuk është bërë publik.

Shanxi, një nga provincat më të varfra të Kinës, njihet si kryeqyteti i minierave të qymyrit të vendit.

Në fillim të viteve 2000, aksidentet vdekjeprurëse ishin të zakonshme në industrinë e minierave të qymyrit të Kinës. Standardet e sigurisë janë shtrënguar vitet e fundit, por aksidentet ndodhin ende.

Në vitin 2023, një shembje në një minierë qymyri vrau 53 persona. Në vitin 2009, një shpërthim në një minierë në provincën Heilongjiang në verilindje vrau më shumë se 100 persona.

Kina është konsumatori më i madh në botë i qymyrit dhe emetuesi më i madh i gazeve serrë.