Një kompani shet miliona orë të lira çdo vit, ndërsa tjetra prodhon ora luksoze që janë shitur për miliona dollarë, përcjell TV21. Së bashku, Swatch dhe Audemars Piguet kanë nxitur një “çmenduri” të shitjes me pakicë sipas parimit “high-meets-low”, që gjatë fundjavës solli skena kaotike në qytete të ndryshme të botës, shkruan CNN.

Nga Parisi deri në Kuala Lumpur, u krijuan radhë të gjata para dyqaneve të Swatch përpara lansimit të së shtunës të “Royal Pop”, një seri orësh xhepi me ngjyra të ndezura të frymëzuara nga modeli ikonik Royal Oak i AP-së. Koleksioni u prezantua nga kompanitë si “një bashkëpunim disruptiv mes dy ikonave të orëbërjes zvicerane”, ndërsa interesimi shpërtheu online pasi dizajnet u zbuluan javën e kaluar.

Megjithatë, në disa vende situata doli jashtë kontrollit. Video të publikuara në rrjete sociale treguan përleshje mes qytetarëve dhe roje sigurie që mezi përballonin turmat.

Në SHBA, 19 dyqane të Swatch u mbyllën për arsye sigurie, ndërsa në Long Island të Nju Jorkut një polic duket se përdori sprej djegës ndaj turmës. Dyqane në disa qytete evropiane u mbyllën përkohësisht, ndërsa Swatch anuloi paraprakisht eventet e lansimit në Indi dhe Dubai. Mediat raportuan edhe për arrestime në Britani të Madhe dhe SHBA pasi turmat refuzuan të shpërndaheshin.

Të dielën, Swatch publikoi një deklaratë në rrjetet sociale duke u bërë thirrje klientëve “të mos nxitojnë drejt dyqaneve në numër të madh”, për shkak të sigurisë së stafit dhe blerësve. Kompania shtoi se “në disa vende nuk mund të pranohen radhë me më shumë se 50 persona dhe shitjet mund të ndërpriten”. Ndërkohë, në faqen zyrtare, Swatch siguroi klientët se koleksioni “do të mbetet i disponueshëm për disa muaj”.

Pse gjithë kjo bujë?
Orët virale janë dizajnuar në tetë variante ngjyrash – nga “Ocho Negro” bardh e zi deri te modelet rozë, të verdha dhe jeshile-blu “Otg Roz”. Numri tetë i referohet formës karakteristike tetëkëndëshe të modelit Royal Oak. Orët e xhepit vijnë me një lidhëse prej lëkure viçi në vend të rripit klasik të dorës, duke i bërë më të përshtatshme për t’u mbajtur në qafë ose të varura në çantë – çka solli krahasime me trendin viral Labubu.

Në një deklaratë të përbashkët, dy kompanitë zvicerane pretenduan se koleksioni “do ta ndryshojë mënyrën se si i mbajmë orët”.

Politika e Swatch për të kufizuar blerjen në një orë për person nuk i ndaloi spekulantët. Produktet u shfaqën menjëherë në faqet e rishitjes, ku çmimet në platformën Chrono24 varionin nga rreth 1.200 deri në afro 6.000 dollarë.

Ashtu si bashkëpunimet e tjera “high-low” – nga Stella McCartney me H&M deri te koleksionet e JW Anderson për Uniqlo – ideja është e qartë: t’u ofrohet klientëve mundësia të zotërojnë një markë ekskluzive që zakonisht është jashtë mundësive të tyre financiare. Me çmime prej 400 ose 420 dollarësh, Royal Pop ofron një version më të përballueshëm të një ore AP, që zakonisht kushton dhjetëra mijëra dollarë.

Për Swatch, përfitimet janë të dukshme: fluks i madh klientësh në dyqane dhe forcim i imazhit përmes lidhjes me një nga prodhuesit më prestigjiozë të orëve në Zvicër. Aksionet e kompanisë mëmë Swatch Group janë rritur me 15% gjatë dy javëve të fundit.

Por çfarë fiton Audemars Piguet nga ky partneritet?

E themeluar në vitin 1875, AP njihet për prodhimin e orëve shumë komplekse me seri të kufizuara dhe lista të gjata pritjeje. Në dhjetor, një orë xhepi e viteve 1920, me funksione astronomike – përfshirë fazat e hënës dhe hartën e yjeve – u shit për mbi 7.7 milionë dollarë në shtëpinë e ankandeve Sotheby’s.

Nga ana tjetër, Swatch shet modele bazë edhe nën 100 dollarë dhe prodhon mesatarisht 3 deri në 7 milionë ora në vit, sipas transmetuesit publik zviceran RTS. Marka, e themeluar në vitet 1980, konsiderohet se shpëtoi industrinë zvicerane të orëve duke i kthyer orët mekanike në aksesorë mode me çmime të përballueshme, në kohën kur tregu dominohej nga orët me kuarc.

Partneriteti mund ta ndihmojë AP-në të rrisë njohjen tek klientët e rinj, veçanërisht te Gjenerata Z, ku Swatch mbetet shumë popullor. Megjithatë, shumë adhurues të orëve kanë ngritur pikëpyetje nëse kompania familjare rrezikon të ulë prestigjin e markës duke iu afruar klientëve që ndoshta nuk do të shpenzojnë kurrë shuma me pesë shifra për një orë.

“Nuk e kuptoj si funksionon kjo për një kompani që shet ora 40 mijë dollarëshe”, shkruante një postim popullor në Reddit. “Kur njerëzit e lidhin markën me 500 dollarë, atëherë 40 mijë dollarët do t’u duken absurdë. Ironikisht, sa më i suksesshëm të jetë bashkëpunimi, aq më e fortë bëhet kjo lidhje.”

Zërat për një partneritet kishin nisur që në vitin 2023, kur llogaria zyrtare e AP-së në Instagram komentoi “Kur po e lansojmë?” në një postim për bashkëpunimin e Swatch me Blancpain. Ish-CEO i AP-së, François-Henri Bennahmias, kishte lavdëruar publikisht edhe bashkëpunimin Omega x Swatch MoonSwatch, që në vitin 2022 shkaktoi radhë të gjata para dyqaneve.

Një fans i njohur i Swatch, Bennahmias kishte deklaruar për Luxury Tribune se bashkëpunimi me Omega ishte “një ide e shkëlqyer” që “nuk e dëmton integritetin e Omega-s, sepse edukon gjeneratën e re mbi ikonat e orëbërjes”.

Megjithatë, mbetet për t’u parë nëse përleshjet, kaosi në qendrat tregtare dhe arrestimet do ta ndryshojnë qasjen e Audemars Piguet ndaj këtij partneriteti.