Aktivisti i njohur i diasporës shqiptare në Zvicër dhe kryetari i Shoqatës Humanitare “Greshnica”, Xhevahir Ramadani, ka reaguar ashpër për zhvillimet e fundit në skenën politike dhe ndikimin e tyre në shoqatat shqiptare në diasporë. Përmes një postimi publik në Facebook, ai ka ngritur shqetësime për, siç thotë, përzierjen e interesave partiake dhe personale brenda organizatave humanitare dhe shoqatave të mërgatës.

Ramadani thekson se shoqatat duhet të mbeten vende bashkimi, solidariteti dhe kontributi kombëtar, e jo të shndërrohen në mjete për interesa individuale apo politike.

Në reagimin e tij publik, ai shprehet se “kanë rënë maskat” dhe se tashmë po dalin në pah fytyrat e vërteta të individëve që, sipas tij, po e përdorin angazhimin në shoqata për interesa personale dhe politike, duke shkaktuar përçarje mes bashkatdhetarëve në diasporë.

Postimi i plotë në Facebook:

“Ranë maskat, u panë fytyrat e vërteta!

Kontributi dhe angazhimi politik nën hijen e shoqatave në diasporë po sjell përçarje, interesa personale dhe mashtrime ndaj njerëzve të sinqertë.

Pyetja është: Kush humb, kush përçan dhe kush përfiton në fund?

Disa individë, me dinakëri dhe prapavijë personale, mundohen të dominojnë në shoqëri vetëm për ta ngritur veten aty ku nuk i kanë as vlerat, as shkollën dhe as historinë patriotike. Fatkeqësisht, shumë njerëz bien pre e këtyre manipulimeve duke menduar se po ndjekin rrugën e duhur.

E them hapur dhe troç:

Ata që i sjellin simpatitë partiake dhe interesat personale brenda shoqatave, nuk duhet të kenë hapësirë në kryesi, sepse ata përçajnë anëtarët, dëmtojnë unitetin dhe shkatërrojnë frymën e bashkëpunimit.

Pasojat janë të rënda dhe të pafalshme, sepse herët a vonë bie maska dhe shihen fytyrat e vërteta. Dhe kjo dhemb shumë.

Shoqatat duhet të mbeten vende bashkimi, respekti dhe kontributi kombëtar — jo mjete për interesa personale apo politike.

Me respekt,

Xhevahir Ramadani”