Një foto e vajzës adoleshente të udhëheqësit të Koresë së Veriut Kim Jong Un duke qëlluar me armë u publikua nga media shtetërore e vendit të enjten, më 12 mars, duke ringjallur spekulimet se ajo është e destinuar të jetë pasardhësja e tij.

Fotografia tregon Kim Ju-E duke qëlluar në një poligon qitjeje me njërin sy të mbyllur, me flakë që dalin nga tyta e armës.

Imazhe të tjera tregojnë gruan e re duke shoqëruar të atin në një vizitë në një “fabrikë të madhe municionesh” që prodhon pistoleta të tipit të ri dhe “armë të tjera të lehta portative”, sipas agjencisë zyrtare të lajmeve KCNA.

Të veshur me xhaketa lëkure identike (një veshje që shpesh shoqërohet me pushtet në Korenë e Veriut), Kim Jong-un dhe vajza e tij morën pjesë në një takim informues nga zyrtarët dhe inspektuan mjediset e fabrikës.

Ata madje u ndalën në poligonin e qitjes së njësisë, ku vetë udhëheqësi i Koresë së Veriut testoi pistoletën e “tipit të ri” që po prodhohej atje, duke shprehur kënaqësi me “performancën e saj të shkëlqyer”.

Kujtojmë se Ju E u shfaq edhe në një seri fotosh zyrtare të publikuara muajin e kaluar, me rastin e punimeve përfundimtare të konferencës së Partisë Popullore në pushtet. Shfaqjet e saj të përsëritura publike kanë përforcuar vlerësimin se ajo konsiderohet një pasardhëse e mundshme e babait të saj.

Familja Kim ka sunduar Korenë e Veriut për dekada të tëra, me regjimin që ka krijuar një kult të fortë personaliteti rreth anëtarëve të saj, të cilët luajnë një rol qendror në jetën politike dhe shoqërore të vendit të izoluar.