Shpenzimet minimale të një familjeje katër anëtarëshe në shkurt janë rritur për gati një mijë denarë në krahasim me janarin, tregojnë të dhënat e Lidhjes së Sindikatave të Maqedonisë, e cila përpilon shportën sindikale konsumatore.

Shporta minimale sindikale për shkurtin është 67.382 denarë dhe në krahasim me shportën minimale sindikale në janar ka një rritje prej 969 denarë. Me një banesë me qira prej 60 metra katrorë, vlera e shportës minimale sindikale rritet në 82.757 denarë.

Rritje prej gati një mijë denarë ka edhe në sektorin ushqimor, përkatësisht nëse për janarin nevojiteshin minimum 24.211 denarë, në shkurt për këtë qëllim nevojiteshin 25.156 denarë.

Nga LSM-ja thonë se vetëm për dy muaj që nga fillimi i vitit, harmonizimi i paralajmëruar i pagës minimale që duhej të ndodhte në mars është shkatërruar me rritjen e shportës minimale sindikale.

“Për vetëm dy muaj, një familje është më e varfër për dy mijë denarë. Për 24 muaj, pra afërsisht në kohën kur ata refuzuan të rrisin pagën minimale, vlera e shportës minimale sindikale është rritur për më shumë se 10.000 denarë, dhe për këtë arsye, në vend që të debatojnë mbi kurrizin e punëtorëve, partitë politike duhet të qëndrojnë pranë tyre, të votojnë për pagën minimale, e cila duhet të jetë 600 euro, dhe të rrisin të gjitha pagat e tjera për të paktën 6.000 denarë”, thotë kryetari i LSM-së, Slobodan Trendafilov.

LSM u ka dhënë afat Qeverisë dhe punëdhënësve deri në fund të shkurtit për të rënë dakord për rritjen e pagës minimale, përndryshe paralajmërojnë një protestë tjetër dhe organizimin e një greve të përgjithshme.