Përvetësimi i inteligjencës artificiale (IA) ka shënuar rritje të ndjeshme në nivel global, por të dhënat e reja tregojnë dallime të theksuara mes vendeve, duke zgjeruar hendekun ndërmjet ekonomive të përparuara dhe atyre në zhvillim.

Sipas një raporti të fundit të Microsoft mbi përhapjen e inteligjencës artificiale në botë, Emiratet e Bashkuara Arabe dhe Singapori dallohen dukshëm, me mbi 60 për qind të popullsisë që ka përdorur të paktën një mjet të inteligjencës artificiale gjeneruese gjatë vitit të kaluar. Të dy vendet po investojnë gjithashtu në zgjerimin e qendrave të të dhënave, pavarësisht temperaturave të larta që e bëjnë funksionimin e tyre më sfidues, raporton The Economist.

Në kontrast të fortë, Amerika Jugore dhe Qendrore mbetet prapa. Në 14 nga 24 vendet e rajonit, normat e përvetësimit janë nën 20 për qind, përfshirë Meksikën, Venezuelën dhe Brazilin. Raporti thekson se përdorimi i inteligjencës artificiale në këtë rajon vjen kryesisht nga institucionet qeveritare, ndërsa sektori privat has vështirësi për shkak të kostove të larta dhe mungesës së aftësive teknike.

Në Azi, Koreja e Jugut, ndonëse renditet e 18-ta globalisht për përdorimin e inteligjencës artificiale, regjistroi rritjen më të madhe gjatë vitit të kaluar. Përhapja e IA-së në vend u rrit nga rreth 26 për qind në gjysmën e parë të vitit 2025 në 30 për qind deri në fund të vitit, kryesisht falë përdorimit në rritje në vendin e punës. E nxitur nga ky ritëm, OpenAI hapi një zyrë në Seul në shtator, ndërsa deri në fund të vitit 2025, ChatGPT u bë aplikacioni më i shkarkuar për telefonat inteligjentë në vend.

Vende të tjera aziatike, si India, Filipinet dhe Malajzia, shënuan rritje më të moderuara në përdorimin e inteligjencës artificiale, me mjete si ChatGPT dhe Gemini ndër më të përdorurat. Megjithatë, përvetësimi i përgjithshëm në Azi dhe Afrikë mbetet ende pas krahasuar me vendet perëndimore.

Ndërkohë, përkundër dominimit global të ChatGPT, platforma DeepSeek ka arritur të fitojë terren në tregje ku mjetet e bazuara në SHBA janë të kufizuara. Ajo mban një pjesë të konsiderueshme të tregut në Kinë (89 për qind), si dhe në Bjellorusi (56 për qind), Rusi (43 për qind), Kubë (49 për qind) dhe disa vende afrikane, ku përvetësimi i përgjithshëm i inteligjencës artificiale mbetet ende i ulët.