Me 13 vota pro, Këshilli i Sigurimit i OKB-së votoi një rezolute të hartuar nga Shtetet e Bashkuara e cila mbështet planin e paqes të Donald Trump për Gazën. Dokumenti, për të cilin Presidenti amerikan tha se do të çonte në paqe të mëtejshme në të gjithë botën, u abstenua nga  Rusia dhe Kina, por  pa vendosur veton.

Trump u shpreh se votimi që njeh dhe miraton Bordin e Paqes, i cili do të kryesohet nga ai vetë, do të mbahet mend si një nga miratimet më të mëdha në Historinë e Kombeve të Bashkuara. Ambasadori i SHBA-së në OKB, Mike Waltz tha pas votimit se rezoluta përfaqëson një hap tjetër të rëndësishëm që do t’i mundësojë Gazës të lulëzojë dhe do të krijojë një mjedis që do t’i lejojë Izraelit të jetojë i sigurt.

 Izraeli tha se plani i Trump për Gazën do të sjellë paqe dhe prosperitet, por Hamasi, të cilin rezoluta e përjashton nga çdo rol qeverisës në Gaza, tha se dokumenti nuk i plotëson kërkesat dhe të drejtat politike dhe humanitare të palestinezëve.

Plani i paqes përmes të cilit dy palët arritën armëpushimin më 10 tetot, autorizon krijimin e një Force Ndërkombëtare Stabilizimi  që do të bashkëpunojë me Izraelin dhe Egjiptin, si dhe me policinë palestineze të trajnuar rishtazi, për të ndihmuar në sigurimin e zonave kufitare dhe çmilitarizimin e Rripit të Gazës.

Me një gjuhë të ndërlikuar, rezoluta përmend krijimin e një shteti të mundshëm palestinez në të ardhmen. “Sapo Autoriteti Palestinez të ketë kryer reformat e kërkuara dhe rindërtimi i Gazës të ketë filluar, mund të jenë krijuar kushtet për një rrugë të besueshme drejt vetëvendosjes dhe shtetësisë palestineze”- thuhet në tekst, mundësi kjo që është hedhur poshtë me vendosmëri nga Izraeli. Rezoluta bën thirrje gjithashtu për rifillimin e shpërndarjes së ndihmës humanitare në shkallë të gjerë përmes organizatave ndërkombëtare humanitare.

Gazetare: Vjollca Zhari

/rtsh.al/