Në dy shkolla të mesme të Tetovës sot kishte alarm të rrejshëm për bomba. Policia është detyruar të largojë nxënësit dhe mësimdhënësit nga objekti. Për dallim nga herët e kaluara, kërcënimi i sotëm ka shkuar direkt në e-mailin e policisë e jo të Shkollës.

“Shkolla e mesme gjimnazi “Kiril Pejçinoviq” këtu në Tetovë, por edhe gjimnazi “7 Marsi”, që në orën e parë të fillimit të mësimit, sot u detyruan t’i evakuojnë nxënësit nga objektet shkollore, shkaku se erdhi Sektori i Punëve të Brendshme dhe iu tha që ka alarm për bombë”, raporton Bashkim Sulejmani, gazetar.

Për dallim nga rastet e tjera, alarmi paralajmërues për bombë sot nuk erdhi në postën elektronike të Shkollës por në MPB

“Alarmin e dhanë organet e rendit pra policia. Ngjashmëria është evidente por kësaj radhë dallimi është se nuk na kanë ardhur emaile tek shkolla por ju ka shkuar emaili në Polici dhe në nuk dinim gjë. Në mëngjes nxënësit hynë në klasa dhe pastaj erdhi policia dhe kërkoi që nxënësit ta lëshojnë objektin shkollor. Dhe kështu ndodhi, policia bashkë me përgjegjësit e ndërrimit nxorën nxënësit nga mësimi dhe vijon kontrolli”, deklaroi Jeton Kamberi, Drejtor i Gjimnazit “Kiril Pejçinoviq” Tetovë.

Nga SPB e Tetovës thonë se po punohet në zbardhjen e rastit dhe vendin nga ku është dërguar emaili.

“SPB Tetovë ka ndërmarrë menjëherë gjitha masat dhe aktivitetet dhe ka evakuuar shkollën nga nxënësit dhe janë siguruar në pjesët e jashtme. Janë marrë masat për kontroll të objektit, por u konstatua se bëhet fjalë për alarm të rrejshëm. Viteve të fundit këto alarme janë shpeshtuar andaj MPB ndërmerr masa dhe Sektori për krim kompjuterik dhe forenzik marrin masat për ta locuar personin që ka dërguar këtë email”, tha Fatmir Rexhepi. Zëdhënës i SPB Tetovë.

Sipas të dhënave të policisë, e-maili dyshohet të jetë shkruar në gjuhën maqedonase, pastaj teksti është përkthyer në shqip dhe është i ngjashëm me emailet apo alarmet e rrejshme të dërguara në të kaluarën. /Alsat.mk