Për gjyqtaret e promovuara Marija Markovska dhe Cvetanka Siljanovska-Kostadinovska në Gjykatën e Apelit të Shkupit, e  të cilat janë gratë e dy zyrtarëve, këshilltarit të kryeministrit Sasho Markovski dhe kryetarit të Gjykatës Kushtetuese Darko Kostadinovski, kryeministri Hristijan Mickoski dje u justifikua para Këshillit Gjyqësor, transmeton Portalb.mk.

Mickoski brenda natës riktheu besueshmërinë e Këshillit Gjyqësor, të cilin e ka quajtur kancer të gjyqësorit pothuajse çdo ditë që kur mori detyrën, dhe kur u pyet për promovimin e gruas së këshilltarit të tij Markovski, ai tha se ajo ishte më e renditura në vlerësimin nga Këshilli Gjyqësor dhe për këtë arsye nuk sheh ndonjë problem në përzgjedhjen e saj.

Mickoski deri më tani vazhdimisht u ka bërë thirrje anëtarëve të Këshillit Gjyqësor të japin dorëheqje, ka fyer dhe kritikuar jo vetëm ai, por e gjithë partia VMRO-DPMNE. I quajnë të korruptuar, krahë të zgjatur të LSDM-së dhe BDI-së, të paaftë. Ata iniciuan një seancë të posaçme parlamentare për interpelancën e tyre, në të cilën votuan mosbesim për gjysmën e anëtarëve të Këshillit Gjyqësor.

Pas seancës, kryeministri njoftoi protesta nëse ata nuk jepnin dorëheqjen dhe tha se ai do të ishte në ballë.

Ishte një nga anëtarët më të kritikuar të Këshillit ai që vlerësoi dhe renditi gjyqtarët – gratë e këshilltarit të kryeministrit dhe kryetarit të Gjykatës Kushtetuese.

Këto ditë, kur publiku është i zhurmshëm për promovimet e grave të zyrtarëve, tashmë është harruar se pesë muaj më parë, gjyqtarja Danka Ristova, gruaja e kryetarit të komunës së Radovishit, Aco Ristov nga VMRO-DPMNE, hyri në Këshillin Gjyqësor.

Ajo u zgjodh nga gjyqtarët në zgjedhje të drejtpërdrejta, por ashtu si kolegët e saj Marija Kletniçka-Markovska dhe Cvetanka Siljanovska-Kostadinovska, Danka Ristova nuk mundi të përmbahej nga kandidimi për poste të larta ndërsa burri i saj ishte kryetar koune.

Në tetor të vitit të kaluar, pasi VMRO-DPMNE fitoi zgjedhjet, prokurorja e Manastirit Irina Trajkoska-Strezovski u zgjodh drejtoresha e re e Akademisë së Gjyqtarëve dhe Prokurorëve Publikë jashtë rregullave, në një seancë të mbyllur.

LSDM-ja kritikoi dje se plani i qeverisë është që të gjitha pozicionet në gjyqësor të mbushen nga bashkëshorte, të afërm dhe njerëz të afërt me drejtuesit e saj. Ata thanë se ngritjet në detyrë dhe përzgjedhjet bazohen në përkatësinë partiake dhe besnikërinë politike, dhe jo në integritet dhe ekspertizë.

Gjatë kohës së Zoran Zaevit, dy nga bashkëpunëtorët e tij të qeverisë u zgjodhën anëtarë të Këshillit.