Roberto Martinez ka shpjeguar arsyen pse Cristiano Ronaldo merr ende ftesë nga Portugalia ani pse është 40-vjeçar.

Pasi bëri debutimin e tij me kombëtaren në vitin 2003, Ronaldo vazhdon të ftohet nga shteti i tij 22 vite më vonë. 

Ronaldo ka 217 paraqitje në emrin e tij dhe ka realizuar 135 gola, duke u bërë golashënuesi më i mirë i të gjitha kohërave në futbollin ndërkombëtar. 

Pavarësisht moshës së tij, ai po vazhdon ta dëshmojë prezencën e tij për Portugalinë dhe Al-Nassr, me qëllimin që të arrijë shifrën e 1000 golave në karrierë. 

Përzgjedhësi i Porutgalisë, Martinez ka thënë për Coaches Voices arsyen pse ai vazhdon ta ftojë pesë herë fituesin e Topit të Artë. 

“Kur flas për një lojtar si Cristiano Ronaldo, unë gjithashtu e vlerësoj atë në bazë të tri aspekteve kryesore. Talenti i tij është i padiskutueshëm, ai është njëri prej më të mirëve në histori të futbollit”. 

“Eksperienca e tij është po ashtu unike, lojtari i vetëm që ka luajtur në gjashtë kampionate evropiane dhe ka më shumë se 200 ndeshje”. 

“Por çfarë qëndron më së shumti është përkushtimi i tij. Pasioni i tij për ta përfaqësuar Portugalinë motivon gjithë ekipin”. 

“Ai nuk është pjesë e ekipit sot për atë që ka qenë më përpara, por për atë që vazhdon të jetë, golashënuesi më i mirë me 17 gola në 21 ndeshjet që i kemi luajtur në dy vite”, ka thënë Martinez. 

Ronaldo dhe Portugalia po bëhen gati për dy ndeshjet ndaj Danimarkës në kuadër të çerekfinaleve të Ligës së Kombeve.