Associated Press ka zgjedhur 10 albumet muzikore më të mira të vitit 2024. Përzgjedhja është bër nga gazetarja e agjencisë së lajmeve, Maria Sherman.
Listën e AP-së kryeson albumi i Beyoncés “Cowboy Carter”.
“Cowboy Carter” – Beyoncé
Ky album 78-minutësh është një përzierje unike e muzikës ‘country’ dhe stilit të fuqishëm të këngëtares Beyoncé.
“Ky nuk është një album ‘country’, por një album ‘Beyoncé’”, pati thënë këngëtarja duke e pozicionuar veten si një lloj ‘opozite’ për strukturat e kamotshme që zotëruan këtë zhanër dhe duke ndihmuar në nxjerrjen në pah të historive, shpesh të injoruara, të artisteve me ngjyrë dhe të tjera në muzikën "country".
Sipas AP, është e vështirë të imagjinohet që ky album të mos konsiderohet si një nga më të mirët e dekadës.
“BRAT”– Charli XCX
Ky album ka shënuar një moment të rëndësishëm në muzikën e vitit 2024. Sipas AP, “Muzika luhatet midis hedonizmit dhe ankthit”, duke sjellë një eksperiencë që tërheq fansat e tingujve të stilit “underground” dhe të tjerë, duke sjellë një formë të re dhe shumë më interesante të muzikës dance-pop.
“Alligator Bites Never Heal” – Doechii
Përmbajtja e këtij albumi është një përzierje e muzikës “R&B” dhe “rap” me rrëfim të mprehtë dhe intensitet, që ka tërhequr vëmendjen me këngë si “Boom Bap” dhe “Catfish”, të cilat theksojnë shkëlqimin e Doechiit në skenën muzikore.
“Manning Fireworks” – MJ Lenderman
Ky album është përzierje e melodive të thjeshta të muzikës “rock” dhe tregimeve humoristike e të mprehta. Sipas AP, “është një kaleidoskop i momenteve brilante” dhe është një klasik për fansat e muzikës alternative.
“Orquídeas” – Kali Uchis
Me një zë të ëmbël dhe të pakrahasueshëm, Kali Uchis, e çon këtë album përtej kufijve të muzikës, duke kaluar nga stili “reggaeton” në “alt-R&B” dhe duke krijuar një përvojë të mrekullueshme, që është përshkruar si një udhërrëfyes i lëvizshmërisë së zhanreve dhe emocioneve.
“GNX” – Kendrick Lamar
Ky është një album surprizë nga Kendrick Lamar, i cili i ka magjepsur fansat me performancën e tij të jashtëzakonshme dhe aftësinë për të kaluar pa mundim mes “cadencave” dhe perspektivave të ndryshme të vargjeve. Siç e përshkruan AP, është një nga më të mirët e vitit.
“Hit Me Hard and Soft” – Billie Eilish
Albumi i tretë i Billie Eilish është një lloj manifestimi i ambicieve të saj. Sipas AP-së, albumi është përzierje e stilit “gotik” dhe produkteve të klasës sociale, duke shfaqur këngë të mrekullueshme si “Lunch” dhe “Birds of a Feather”. Ky album tregon se nuk ka asgjë që Billie Eilish nuk mund ta bëjë.
“Two Star & The Dream Police” – Mk.gee
Mk.gee ka sjellë një album të veçantë, që përfshin një kombinim të lo-fi me meloditë pop dhe prodhim të veçantë. Ky album është përshkruar si “muzikë e shkëlqyer për të mësuar”, por gjithashtu ka ndikim të fortë në çdo dëgjues për shkak të kompozimeve të tij të veçanta me kitarë.
“The Past Is Still Alive” – Hurray for the Riff Raff
Albumi i Hurray for the Riff Raff, i udhëhequr nga Alynda Segarra, është rrëfim i thellë për jetën në Amerikë dhe përvojat e një individi që ka jetuar larg nga shtëpia. AP ka shkruar se ky album tregon Amerikën me gjithë bukuritë dhe vështirësitë e saj, duke sjellë një lloj portretizimi të jetës së ashpër reale.
“Phasor” – Helado Negro
Ky album i Helado Negro është një eksplorim i identitetit latin përmes muzikës elektronike dhe asaj që tingëllon si e ngadaltë. AP ka shkruar se albumi është kënaqësi për t’u dëgjuar dhe gjithashtu një për t’u analizuar, duke shfaqur një lloj veçantie dhe ndjeshmërie ndaj natyrës.
