Përballjen e parë në kuadër të kualifikimeve për Kampionat Evropian, Kosova kundër Rumanisë e zhvilloi më 16 qershor 2023 në Prishtinë.

Në stadiumin “Fadil Vokrri” rrjeta e rumunëve u tund nga Edon Zhegrova, por goli u anulua nga VAR-i për një pozicion jashtë loje. Ai duel u mbyll 0-0, njofton Klankosova.tv

Ndeshja kthyese në Bukuresht më 12 shtator të po atij viti, u karakterizua me thirrje raciste të tifozëve vendas, të cilët edhe shfaqën shumë parulla anti-shqiptare e kundër shtetit të Kosovës.

Në fund, Rumania fitoi 2-0.

Ballafaqimi i tretë dhe i fundit deri sot, u zhvillua një vit më vonë, sërish në kryeqytetin e Kosovës, ku në kuadër të Ligës së Kombeve, reprezentacioni ynë shtetëror u mposht 0-3.

Sot në udhëtim te Rumania, përfaqsuesja  kosovare synon t’ia bëjë ‘sefte’ një triumfi ndaj këtij oponenti, mbase në ndeshjen më të rëndësishme deri tani, e cila fillon në orën 20:45.

Rumania ka 12 pikë, ndërsa Kosova 9, raporton Klankosova.tv

Që të mund të arrihet vendi i parë në grup, vetëm fitorja është opsion, çdo rezultat tjetër e “gozhdon” Rumaninë në krye.