Një gjykatës ka urdhëruar që gjigandi i rrjeteve sociale X, i njohur më parë si Twitter, të ndalohet së funksionuari në Brazil.

Gjykatësi i Gjykatës së Lartë, Alexandre de Moraes, e solli këtë vendim pasi pronari miliarder i platformës, Elon Musk, nuk arriti të dërgonte një përfaqësues ligjor në Brazil.

Gjyqtari dhe Musk janë grindur në publik për muaj të tërë pasi X nuk respektoi urdhrat ligjore për të bllokuar disa llogari për përhapjen e lajmeve të rreme dhe urrejtjes, shkruan skynews.

Në vendim, gjyqtari urdhëroi gjithashtu pagesën e gjobave që arrinin në 18.5 milionë reais (3 milionë euro).

Kushdo që përdor rrjete private virtuale (VPN) për të anashkaluar bllokimin dhe qasjen në X, mund të gjobitet deri në 50 mijë reai në ditë – e barabartë me gati 8400 euro.

Duke iu përgjigjur vendimit në një seri postimesh në X, Musk tha se Brazili “po mbyll burimin numër 1 të së vërtetës” dhe “regjimi i tij shtypës” është “i frikësuar pasi njerëzit po mësojnë të vërtetën”.

Ndryshe, Brazili është një treg i rëndësishëm për X, i cili ka luftuar me humbjen e reklamuesve që kur Musku bleu kompaninë në vitin 2022.

Sipas grupit të kërkimit të tregut Emarketer, rreth 40 milionë brazilianë – afërsisht 20 për qind e popullsisë – përdorin platformën të paktën një herë në muaj. /Telegrafi/