Duke komentuar intervistën e zëvendëskryeministrit Ivan Stoilkovic në të cilën ai e pranon se është me bindje Putiniste, deputetja e Bashkimit Demokratik për Integrim, Rina Ajdari ka thënë se kjo është “logjika” e ç’orientuar e tyre dhe se ata me shpirtin, mendjen dhe zemrën e kanë në Rusi.

Sipas Ajdarit, aktet e tilla nuk do të tolerohen nga SHBA-të dhe vendet anëtare të NATO-s, që sipas saj për momentin ju kanë lënë “pak” hapësirë politikanëve të tipit të tillë për ti parë se deri ku mund të shkojë ambicia dhe tentativa e tyre për të baltosur e diskredituar perëndimin.

Reagimi i plotë:

Kjo është “logjika” e ç’orientuar e tyre! Shpirtin, mendjen dhe zemrën e kanë në Rusi. Deri këtu në rregull. Por, kur bëhet fjalë për një vend anëtar të NATOs këtu, veçmë kemi problem tejet serioz të sigurisë në aspektin rajonal por edhe në atë ndërkombëtar. Këtë akt dhe këto deklarata të tilla, Shtetet e Bashkuara të Amerikës dhe vendet anëtare të NATOs nuk do ti tolerojnë por po ju lënë hapësirë ti shohin se deri ku mund të shkojë ambicia dhe tentativa e tyre për të baltosur e diskredituar perëndimin dhe për të ngritur në piedestal e për të faktorizuar ndikimin lindor rus.