Shirat e dendur të lidhur me uraganin Beryl dhe stuhinë e mëparshme tropikale Alberto kanë bërë që të paktën 200 krokodilë të hyjnë në zonat urbane në shtetin verior meksikan të Tamaulipas, përballë Teksasit, thanë autoritetet shtetërore dhe federale këtë javë.

Deri më tani, autoritetet thonë se kanë kapur dhe zhvendosur rreth 200 nga zvarranikët e mëdhenj që kur stuhia Alberto goditi rajonin në muajin qershor. Beryl goditi të njëjtën zonë përpara se të zbriste në Teksasin jugor në fillim të kësaj jave.

Autoritetet thanë se shirat e dendur ngritën nivelet e ujit në lagunat bregdetare, duke i bërë kafshët të zvarriten në qytete si Tampico dhe qytetet e afërta të Ciudad Madero dhe Altamira, ku të paktën 165 krokodilë janë kapur dhe janë zhvendosur.

Shefja e departamentit të mjedisit shtetëror të Tamaulipas, Karina Lizeth Saldívar, tha në një deklaratë se "shirat e fundit kanë rritur nivelet e ujit në sistemet e lagunës, gjë që kishte çuar në një rritje të paraqitjes së krokodilëve".

Zyra Federale e Prokurorit të Përgjithshëm për Mbrojtjen e Mjedisit tha se rreth 40 krokodilë të tjerë ishin kapur në zonë në muajin qershor dhe u zhvendosën në habitatin e duhur jashtë zonave të populluara.

Problemi mund të vazhdojë, tha zyra, duke vënë në dukje se "me uljen e nivelit të ujit në vende si rrugët dhe kanalet kulluese që u përmbytën, krokodilët do të shfaqen dhe paraqitja e tyre me siguri do të rritet".

Problemi doli në dritë këtë javë kur përdoruesit e mediave sociale postuan video të disa krokodilëve të lidhur në zonat urbane. Kjo "shkaktoi një zhurmë në mediat sociale", tha departamenti.

Krokodilët janë një specie e mbrojtur në Meksikë. Sulmet prej tyre në Meksikë janë të rralla, por kanë ndodhur./