Kryeministri Benjamin Netanyahu deklaroi se sulmi izraelit në qytetin jugor të Gazës, Rafah ishte një gabim tragjik, shkruan AP.

Sulmi i vuri zjarrin një kampi ku strehoheshin palestinezët e zhvendosur dhe, sipas zyrtarëve lokalë, vrau të paktën 45 persona.

Sulmi vetëm sa shtoi kritikat në rritje ndërkombëtare me të cilat është përballur Izraeli për luftën e tij me Hamasin, me aleatët e tij më të afërt që shprehin zemërim për vdekjet e civilëve.

Izraeli këmbëngul në respektimin e ligjit ndërkombëtar edhe pse përballet me shqyrtimin e gjykatave më të larta të botës, njëra prej të cilave javën e kaluar bëri thirrje për ndalimin e ofensivës së Rafahut.

Netanyahu nuk dha detaje mbi gabimin.

Ushtria izraelite fillimisht pretendoi se kishte kryer një sulm ajror të saktë në një kompleks të Hamasit, duke vrarë dy militantë.

Ndërsa dolën detaje të sulmit dhe zjarrit, ushtria tha se ”kishte hapur një hetim për vdekjet e civilëve”.

Sulmi i së dielës, i cili dukej të ishte një nga më të përgjakshmit e luftës, ndihmoi në rritjen e numrit të përgjithshëm të vdekjeve palestineze në luftë mbi 36 000, sipas Ministrisë së Shëndetësisë të Gazës.

”Me gjithë përpjekjet tona më të mira për të mos dëmtuar civilët e pafajshëm, ndodhi një gabim tragjik mbrëmë. Ne po hetojmë incidentin”, theksoi Netanyahu në një fjalim në parlamentin izraelit.